Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Café littéraire
Sujet : L'étuve d'em man
jeangabelou5910/07/2009 17:56
Tout m’jonnesse, ej l’ai eu d’vant mes yux, trônant dins l’pièche à tout faire, cauffant l’mason du 1er janvier au 31 décembre. Ale semblot éte là ed pis toudis. Pou cha, ale avot caire qu’in s’occupe d’ale, parfos capricieusse, mais pétant l’fux in toutes saisons pou nos faire plaiji.
A chinque heures, souvint bin avint cha, em man ale comminchot pa un bon nétiache d’ech pot, pis ale vidot ech baque à chindes dins eune vièle bouleusse. Ale préparot eune ou deus pugnies d’équettes ou du tiot bos qu’min père i li cassot. Pis l’rituel i continuot, deus paches ed « Nord Matin » qu’ale rond’lot un boule,( el reste i finichot dins l’basse cambe), i restot pus qu’à poser ches équettes pa d’zeur, rajouter eune tiote pelle ed gaillettes, craquer eune brokète pou i bouter l’fux.
Un tiot peu al fos, ch’t’étuve ale sortot d’esn n’ingourdiss’mint, pou s’récauffer duch’mint , rakot des flammes par sin pot, cantot ed pus in pus fort, em man ale étot obligée d’el rapager in l’acouvtant aveuc eune palée ed flou, pace qui fallot incore frotter es plaque aveuc d’el toile émeri, pis rétaler d’el pâte à l’mine ed plomb.
In rin d’ tans el castrole d’iau ale frémichot aveuc es pugnie ed chicorée, pindant ch’tans là man ale teurnot sin café, ch’moulin coinché intre ses gampes, restot pus qu’à l’mette dins l’cauchette.
El première goutte ed fraiche, d’eune lonque série, pis ale attindot qu’em père i rinte ed sin poste ed nuit. I avot à peine hauché l’clinche pou li rintrer qu’es tiote bistoule ale finquot dins s’jate. Avant d’el boire i posot s’musette aveuc les tiotes gaillettes pou l’ind’mint, faijot eune baisse à man
- t’es pos trop mate min homme ?
- et ti ,t’as bin dormi min loute ?
Ch’étot comme cha tout les jours.

Brokète : allumette – bouter : mettre le feu - rapager : camer – acouvter : recouvrir – haucher : soulever, élever


JMK

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:batiller
français:batailler, se battre
genre:v.
Accéder au glossaire