Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Café littéraire
Sujet :Bistrot
batisse16/07/2009 16:53
J'ai connu un bistrot, magique sorti de rin.
I n'y venot personne tchand qu'in l'a découvert
Tchand qu'in y est intrés, in ne se connaichot nin
Pourtint ch'est vite devenu le paradis chu tierre.

I n'd'a un dins l'équipe qui ouvrot dins l'chimint
Et qui contribua a faire des bases solites.
Ch'étot et ch'est toudis un garchon de talint
Avec eune âme d'artiste qu'in a aimé tout de suite.

Ch'étot eune époque folle, i avot équipe de nuit,
Présidée par un viux qui avot des insomnies
Tchand qu'i allot se coucher i crojot in sortint.
Des gins nin pinsionnés qui allottent au turbin.

Nin la peine de cachi l'adresse de ce bistrot
I n'est dins aucune rue, ch'est un lieu virtuel.
Ch'étot nou salle de jeux, in y causot patos
Nou repère de copains qui rindot nous vies bielles.

Le patos in le causot et in le protégeot.
Ch'étot nou principal copain dins le bistrot.
In le savot malate, gramint déméprisé
Gare à ch'ti qui osot chez nous le maltraiter.

In avot peut-être tort mais in pinsot tertous
Que pour être respectée, eune lingue, même secondaire
A beso d'un squelette, orthographe et grammaire
Surtout tchand qu'in l'écrit, sinon cha fout la frousse.

A ch'ju-là in étot facilemint eune douzaine.
Tchand qu'i venot un nouvieau in décelot très tôt
Si qu'i serot amiteux ou mache pour nous patos.
I n'd'a grammint qui n'ont nin tenu eune semaine.

Cha qu'in aimot grammint, ch'étôt les nouvielles tiêtes
Qui savottent rigoler mais qui savottent aussi
Que le patos bin écrit cha serot dur peut-être
Qui comptottent chu les autres pour l'aide et les avis.

Je me souviens d'eune guernoule, arrivée timidemint
In n'osint nin écrire, croyint qu'in in rirot.
Tertous in s'y est mis in l'prenint par la main.
A ch't'heure, même au boulot elle écrit in patos.

Ch'est vrai que des fos in étot plutôt maches.
I n'd'a qui s'in sont pris des sacrées dins lus loupes.
I fallot respecter du bistrot l'bonne imache.
I n'étot nin question de crachi dins la soupe.

Et ch'est nous jone artiste, avec s'n'âme sinsipe
Qui a in tout premi sinti le vint qui tournot
In étot trop gintils avec certains nouvieaux
Cha sintot l'triste fin, et i a chingé d'équipe.

A m'mote qu'i avot raison, ch'est des fos dur la vie.
Un jour i a arrivé un massacreux de patos
Dont in a su que ch'est un accidint d'auto
Qui l'avot esquinté. Du coup in n'a rin dit.

Et le vier i étot dins le fruit. Allez donc expliquer
A un qui se pointe après, qu'ichi in fait l'effort
D'écrire le patos pour qu'i soche respecté
Et avec des sujets qui rehaustent le Nord.

Si un jour vous allez écouter un canteux
Et qu'au lieu des canchons vous intindez surtout
Des ginses qui crittent fort tout alintour de vous
Vous vous direz peut-être "mais quelle bande de soyeux"

J'ai connu un bistrot, magique sorti de rin
I n'y venot personne tchand qu'in l'a découvert
In voulot y soigner nou patos qui in a besoin
A ch't'heure in n'y va pus, i a devenu eune misère.

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
cette histoire ?
La statue de Sainte-Barbe
Cafougnette est en train de sculter une statue de Sainte-Barbe. Un de ses camarades d'approche et le regarde faire. - Ch'est du boulot, hein ! - M...............
Accéder à l'histoire